من منا يحتاج الى علاج نفسى ؟؟؟

من منا يحتاج الى علاج نفسى ؟؟؟

كتبت / جيهان السنباطى

فى إحدى حفلات الصراخ والعصبية الأسرية , التى تتكرر بشكل يومى فى معظم البيوت المصرية , قال الزوج وهو مُتكأ على مقعده , يتصفح صحيفته اليومية : فين الشاى ياهانم ؟ هرولت اليه الزوجة حاضر حاضر اصبر عليا شوية هو كل حاجه عليا , فلم يعجبه الزوج تكرار كلمة الإستجابة ولانبرة الإعتراض فى صوت الزوجة , فقفز من على مقعده متوجهاً اليها , مغلولاً يجز على أسنانه وبكل عصبية قال : بتكرريها ليه هو انا مش سامع , هو انا كل ما أطلب منك حاجه تتلكعى فيها , انا خلاص زهقت منك ومن العيشة دى ومن البيت واللى فيه , خلاص مش عايز شاى ولاعايز منك حاجه دى عيشة تقرف , ثم هب مسرعاً وكأنما لدغته أفعى سامة , ليلملم ملابسه على عجل ويرتديها , ثم توجه الى باب المنزل وخرج ورده بعنف شديد خلفه دون حتى النظر اليها , وتركها وعلامات العجب مرسومة على ملامحها تبحث عن سبب الخلاف والعصبية أو ماذا فعلت ليكون هذا هو رد فعله على شىء بسيط صدر منها  .

خرج الزوج من منزله ونيران الغضب تنهشه وهو لايدرى ماحدث , ومالذى دفعه لأن يكون بهذه العصبية , ولماذا تتكرر حلات العصبية والإكتئاب التى يشعر بها , ولماذا يصاب بالزهق والملل من البيت ومن فيه ويرغب دائما فى الخروج والإبتعاد عنه , وخيل اليه للحظات بأنه مريضاً نفسياً ويحتاج الى طبيب نفسى فوراً , فإتصل بصديق له يطلب منه عنوان طبيب نفسى يعرفه من أجل أحد اصدقائه فلم يفصح له صراحة من المريض الذى يحتاج الى طبيب , وأخذ منه العنوان وذهب اليه .

وعند لقاءه بالطبيب لأول مرة , قال له الطبيب : مما تشكو ؟ قال له اشعر بأننى لم أعد أنا , حقوقى منى تضيع , وضغوط الحياة تكبلنى , ومسئولية البيت والأسرة تخنقنى , قد بدأت أحلم أحلام تزعجنى , واسمع أصوات آخرى أحسها من عالم آخر تهدهدنى , فقال له الطبيب : ماذا تعمل ماهى مهنتك ؟؟؟ قال له موظف , فقال له: وزوجتك ؟؟ قال له زوجتى لاتعمل فهى ربة منزل فقط , فسأله متى تستيقظ انت وزوجتك من النوم ؟ قال له زوجتى تستيقظ الساعة الخامسة صباحاً وأنا استيقظ الساعة الثامنة , فقال له : ولمَّ تستيقظ زوجتك مبكراً هكذا , قال له الزوج : كى تجهز الإفطار للأولاد وتلبسهم وتجهزهم للمدرسة , وبعدين تزل توصلهم الى المدارس وترجع البيت ومعاها الجورنال اليومى بتاعى , تحضرلى الفطار وتصحينى من النوم , وتحضر لى كل طلباتى , أصلها ربة منزل مش بتشتغل , فقال له الطبيب : ولما انت بتنزل على شغلك هى بتعمل ايه ؟ قاله الزوج : بترتب البيت , وترتب المطبخ , وتغسل الغسيل , وتنشره , وبعدين تنزل تشترى طلبات البيت , وترجع على المطبخ تعمل الاكل بسرعه عشان الأولاد لما ترجع تلاقى الاكل جاهز , وبعدين بتنزل تانى تجيب الاولاد من المدارس وتطلع تغير لهم ملابسهم وتغسل لهم ايديهم وتأكلهم , أكون انا وصلت البيت , فقال له الطبيب : وماذا تفعل عند وصولك البيت ؟ قال له اغير ملابسى وأتوضأ واصلى وأجلس على االأريكة أتصفح جريدتى حتى تحضر لى زوجتى الغذاء , فقال له الطبيب : الا تبادر بمساعدتها فى شىء ؟؟ فقال له الزوج : لا انا بكون راجع من الشغل تعبان ومهدود وهى مش وراها حاجه هى اصلا مش بتشتغل هى قاعدة فى البيت , مفيش وراها غير البيت والاولاد , قاله : طيب وبعد مابتتغدى بتعمل ايه ؟ قاله بدخل انام ساعتين , قال له الطبيب : وزوجتك , قاله بتدخل تغسل الاطباق وترتب المنزل , وتشيل الغسيل وتطبقه وترصه فى الدولاب , الى أن يستيقظ الاولاد من النوم فتعمل لهم مشروب ساخن وتبدأ معهم فى المذاكرة وعمل الواجب اليومى , فقال له الطبيب وانت ؟ قاله انا بكون صحيت طبعا من النوم بقوم اصلى وهى تعملى كوب الشاى وتشوف طلباتى , قال له : وانت مش بتقوم تعمله ليه ؟؟ قاله انا شغال طول اليوم بره البيت بشقى وبتعب عشان اجيب لهم القرش اللى يتصرف عليهم وهى قاعدة مبتعملش حاجه , لانها ربة منزل مش بتشتغل , فقال له الطبيب : طيب بعد كده زوجتك بتعمل ايه ؟؟ قال له الزوج : بعد ما الاولاد يخلصوا مذاكرة تعشيهم وتنيمهم فى سرايرهم وتدخل تانى ترتب المطبخ , وانا فى الآخر خالص تحضرلى العشاء وترتب حجرة الجلوس من الأكواب وزجاجات المياة الفارغة وبواقى الطعام وتغسل طفاية السجاير ثم تغلق الابواب والنوافذ والاضواء , وننام , وكده اليوم خلص .

نظر الطبيب الى الزوج فى تعجب ولم يجد كلمات يرد بها عليه , وانما قال له كلمتين مختصرتين فقط " روح بيتك وبوس إيد زوجتك "

تفتكروا بعد كل هذا مين يحتاج الى طبيب نفسى بجد الزوج ولا الزوجة ؟؟؟؟